Hy het opgestaan! Hy het waarlik opgestaan! Ons sien dit vandag in 'n leë graf! En waarom is die leë graf so belangrik? Sodat, soos Johannes in 20:31 sê, julle kan glo dat Jesus die Christus is, die Seun van God, en dat julle deur te glo, die lewe in sy Naam kan hê. En dit is wat ons in hierdie gedeelte sien. Die uiteinde is geloof in Christus.
Ons gaan vandag 'n verhaal verken wat ons neem van duisternis tot lig, van ontkenning tot geloof, van twyfel tot vertroue.
Van ontkenning tot geloof – die verhaal van die leë graf:
- Maria Magdalena in ontkenning
- Petrus ondersoek
- Johannes glo
Maria Magdalena in ontkenning
En vroegoggend, op die eerste dag van die week, terwyl dit nog donker was, kom Maria Magdalena tot by die graf. Dit was die begin van 'n nuwe skepping! Op die eerste dag beweeg ons van duisternis na lig. Op die eerste dag van die eerste week in die geskiedenis het God gesê: "Laat daar lig wees!" En wat het gebeur? Lig het in die duisternis geskyn!
Maria het vertrek terwyl dit nog donker was, simbolies van waar haar hart was. Nog steeds in die donker. Maar kan julle die son sien opkom, geliefdes? Kan julle die God van die lig weer sien praat in die duisternis van die wêreld: "LAAT DAAR LIG WEES!" Kan jy hoor hoe sy stem tot verduisterde harte spreek? Laat daar lig wees!
Heerlikheid. Hoop. Lewe! Die Seun van geregtigheid staan op om in almal se harte te skyn! Johannes begin sy evangelie met hierdie tema van lig en duisternis wanneer hy in Johannes 1:4-5 sê: "In Hom was lewe, en dié lewe was die lig vir die mense. En die lig skyn in die duisternis, en die duisternis kon dit nie uitdoof nie."
Die werkwoorde is almal in die teenwoordige tyd en dra oor dat daar iets opwindends aan die gang is. Dit is nie 'n gebeurtenis wat net histories is nie – vir die apostel Johannes is dit 'n altyd-teenwoordige gebeurtenis. Die kruisiging is die verlede. Die opstanding is die teenwoordige. Hy leef – om nooit weer te sterf nie!
Let ook op, net as 'n kantaantekening, dat dit 'n vrou is wat die eerste by die graf is. Dit is een van die redes waarom ons die Bybel kan vertrou, want as dit ‘n versinsel is, sou hulle nooit ‘n vrou eerste na die graf laat gaan het nie... Hul getuienis was nie betroubaar nie en sou nie in die hof gehandhaaf gewees het nie. Niemand wat dit versin het, sou vroue as getuies gestel het nie.
Sy sien dat die klip van die graf verwyder is. Daardie klip wat die Romeine daar gerol het, wat die Joodse leiers verseël het en waarvoor hulle 'n wag geplaas het. Die wagte is weg, die seël is gebreek en die klip is weggerol. Iets was besig om te gebeur. Maar steeds was haar hart verduister. Sy kyk en hardloop om ander te vertel.
Sy hardloop toe en gaan na Simon Petrus en na die ander dissipel vir wie Jesus liefgehad het, Kan jy jou indink hoe hulle voel? Johannes: die Een wat hom liefgehad het, en vir wie hy die liefste was, was weg. Dood. So het hy gedink. Vir Petrus was die laaste herinnering aan Jesus se lewe sy ontkenning! Die een wat Hom verloën het, en die een wat Jesus liefgehad het. Kon daar dalk nog hartseerder mense in Jerusalem gewees het op daardie tydstip? Hulle was saam in hul hartseer toe Maria uitasem aangehardloop kom – en sê: Hulle het die Here uit die graf weggevat, en ons weet nie waar hulle Hom neergelê het nie. Wie is hierdie mense wat Maria dink Hom weggevat het? Ons weet nie wie sy in gedagte het nie – moontlik die Romeine of die Joodse leiers. Nietemin, haar eerste reaksie was om te dink dat die liggaam van Jesus gesteel is. Sy het nie die opstanding van Jesus gewens of verwag nie, en sy het beslis nie gedink dat Hy gelewe het uit wensdenkery nie, soos sommige mense beweer. Sy was daarop gerig om die dooie liggaam te vind en dit te versorg.
Let op dat, alhoewel sy glo dat Hy dood is, noem sy Hom steeds Here! Maar nog nie die lewende Here van hemel en aarde nie! Sy is nog in die duister – dit sal eers later wees dat haar oë oopgemaak word. Maria het Jesus al baie keer oor sy dood en opstanding hoor praat. Maar hartseer en die oënskynlike onvermydelikheid en finaliteit van die dood het haar gedagtes vertroebel.
Ek weet nie waar jy op jou geloofsreis is nie, maar as jy soos Maria is, daag ek jou uit om 'n bietjie nader te kyk. Sommige van ons is in die duister. Jou lewe het nie die werklikheid van Christus se opstanding ervaar nie. Jy is dalk bang om daardie soort hoop te hê, want die wêreld het alreeds vantevore die hoop vernietig. Moenie ophou soek nie. Die opstanding is werklik. Die nuwe skepping het begin.
Petrus ondersoek
Petrus en die ander dissipel het toe met uitgegaan en na die graf gegaan. 4 Die twee het saam gehardloop, Wat moes deur hulle gedagtes gegaan het terwyl hulle gehardloop het!? Die tradisie sê dat Petrus 'n ouer man was en Johannes jonger, dit is dus geen wonder nie dat ... die ander dissipel vooruit gehardloop het, vinniger as Petrus, en eerste by die graf aangekom.
Waarom vertel die Bybel dit vir ons? Dit is besonderhede – en besonderhede maak saak. Want dit is 'n ware verhaal. Dit het regtig gebeur. Dit is nie een of ander denkbeeldige opstanding wat ons glo nie! Hierdie dag het regtig gebeur; hierdie twee mans, een middeljarig en een miskien in sy 20's, het regtig gehardloop. Dit is asof Johannes dit soos gister kan onthou, hoewel hy dit jare later skryf.
5 Toe hy vooroor buk, sien hy die linnedoeke lê, Johannes kom eerste by die graf, maar kyk net na binne. Die werkwoord vir ‘kyk’ is hier dieselfde as in vers 1 met Maria. Hy kyk. ... hy het egter nie binnegegaan nie. Miskien wou hy nie sy hoop daarop stel nie. Maar toe hy die linnedoeke sien, moes hy geweet het dat dit nie 'n eenvoudige verskuiwing van 'n liggaam na 'n ander plek was nie. Wat het veroorsaak dat hy nie wou ingaan nie? Ons weet nie – al wat ons weet is dat hy net kyk.
6 Maar toe Simon Petrus wat hom gevolg het, daar aankom, het hy die graf binnegegaan. Petrus is altyd voor op die wa, miskien selfs ‘n bietjie onbeskaamd, en huiwer nie. Hy gaan die graf binne om ondersoek in te stel. Ek sê ondersoek, want hier verander die werkwoord vir ‘kyk’ na 'n werkwoord wat beteken om "noukeurig te sien of te kyk", en wat sien hy? Jy kan sien hoe hy in die graf rondkyk.
Hy het die linnedoeke daar sien lê, en die doek wat oor sy kop was. Dié doek het nie by die linnedoeke gelê nie, maar was eenkant, afsonderlik opgerol. Daar is die linnedoeke waarin hulle hom toegedraai het. Daar was die gesigdoek wat sy kop bedek het. Maar vreemd genoeg het dit nie by die linneklere gelê nie, maar eenkant, afsonderlik opgerol. Asof iemand doelbewus in die graf opgestaan en sy bed opgemaak het voordat hy uitgegaan het.
Was daar iets bekends aan die manier waarop dit gevou is? Ek het gewonder oor hierdie detail in Johannes se verslag, omdat die meeste van ons klein gewoontes het wat ons kenmerk. Was daar iets wat hulle laat dink het: Jesus moes dit gedoen het?
Ons weet nie. Ons weet wel dat dit 'n doelbewuste daad was en dat die doeke nie geskeur en oral rondgegooi is nie. Dit is doelbewus gedoen. Dit was die Here van die lewe – die lig van die lewe – wat die dood vir ewig tot rus gebring het. En tog sien Petrus dit nog nie. Hy is nader aan die waarheid as Maria – hy het binnegegaan. Hy sien. Hy ondersoek en besef iets het gebeur. Maar die lig het nie deurgebreek nie. Geliefdes, as daar enige twyfel is – kom kyk asseblief, die graf is leeg. Kyk deur die oë van Petrus en sien die leë graf, met die opgevoude linne. Ondersoek. Dink daaroor... As hierdie graf leeg is, wat is die implikasies! En glo!
Johannes glo
8 Toe het ook die ander dissipel, die een wat eerste by die graf gekom het, binnegegaan, en hy het gesien... Wat het hy gesien? Dieselfde dinge ... maar hy gaan 'n stap verder en sê: hy het gesien en geglo; Weer word 'n ander woord vir sien/kyk gebruik. Die verhaal wat in die donker begin, eindig met die lig van geloof in die hart van die geliefde dissipel! Daar is die dagbreek, die eerste aanduiding van lig het sy hart oorstroom – hy glo!
Die geliefde dissipel is 'n voorbeeld vir almal vir wie Jesus liefhet. "Gelukkig is hulle wat nie gesien het nie, en tog tot geloof gekom het" – dit is wat Jesus sê wanneer Hy later in hierdie hoofstuk aan hulle verskyn. Ons dink dikwels dit het betrekking op ons, en dit is ook so, maar Johannes was die eerste een van ons! Hy was die eerste een om te glo sonder om die liggaam te sien!
O, hoe moes dit gevoel het! Dit was hul hoop... dit was hul lewe. Hy het gesien en geglo.
Sien jy dit? Glo jy dit?
Dit is die vraag. Ek daag jou uit: kyk, ondersoek, glo! Hierdie geloof is nie blind nie, dit is werklik! Die liggaam is weg. Dit is nog nooit gevind nie en sal ook nie op hierdie aarde gevind word nie. Die heiliges aanskou die opgestane Een in die hemel, selfs terwyl ons praat! Ek daag jou opnuut uit om jou opgestane Verlosser met 'n lewende geloof te omhels! Hy is die Eersteling van die nuwe skepping – die eerste vrug van die opstanding. Die dood, die straf vir sonde, is betaal. En die lewe is joune! Omdat Hy leef, is die toekoms veilig! Jou skuld is betaal! Die dood is nie die einde nie!
Soos Paulus, 'n ander apostel, sê: "En sodat ek Christus kan ken, die krag van sy opstanding, en die verbondenheid met sys lyding, deur aan sy dood gelykvormig te word." As jy nie in die opstanding glo nie, dan is hierdie lewe al wat daar is. Dan is daar geen hoop nie, en lyding word ondraaglik, die dood word ondraaglik. Maar met die wete dat my graf en ons graf eendag leeggemaak sal word? Omdat ek weet dat, omdat Hy lewe, ek ook sal lewe! Dit verander alles! Dit is dieselfde krag wat Christus uit die dood opgewek het, wat dooie sondaars opwek om lewende heiliges te word!
Die graf is leeg. Dit is so belangrik dat al die evangelies dit opteken. Hoekom? Want dit het groot implikasies vir ons. Baie van ons lidmate het al gesterf vandat hierdie kerk geïnstitueer is. Diegene wat begrawe is, se liggame nog daar. Maar hier is een graf, in die middel van die geskiedenis, wat leeg is. Dit beteken dat die vloek verbreek is. Die dood is oorwin. Daardie leë graf beteken dat elke graf van almal wat in Christus gesterf het – leeg sal wees. Elke begrafnis ongedaan gemaak in 'n dag van blydskap. Hierdie leë graf spreek vandag tot jou en my en sê: moenie die dood vrees nie.
Hoewel Johannes geglo het, het hy nie die volle gevolge van sy geloof gesien nie. Die son was al op, maar dit was nog dagbreek. 9 Hulle het nog nie die Skrif verstaan dat Hy uit die dood moes opstaan nie.
Dit is die uiteindelike bewys. Die Skrif – watter Skrifte? – vir Johannes was dit die Ou Testament.
Om te glo en die volle implikasies van Jesus se opstanding te verstaan, is twee verskillende dinge. Maar dit sou kom. Hulle sou verstaan dat Hy die tempel was wat herbou sou word, Hy was die tweede Adam wat die dood ongedaan sou maak, sy liggaam sou nie verval sien nie, soos Dawid in Psalm 16 gesing het: Hy sou vir ewig en altyd oor Dawid se troon en sy koninkryk regeer. Hy was die Dienskneg-Koning wat in Jesaja belowe is, wat die nuwe skepping sou bring! Hy is die lewende Advokaat en Hoëpriester!
Ten slotte:
Die opstanding beteken dat Jesus na die Gees van heiligheid op grond van sy opstanding uit die dood kragtig aangedui is as die Seun van God (Romeine 1:4).
Die opstanding beteken dat ons sekerheid het van ons eie opstanding: Want as ons glo dat Jesus gesterf het en opgestaan het – God sal ook so diegene wat in Jesus gesterf het, deur Jesus met Hom saamneem (1 Thessalonisense 4:14).
Die opstanding beteken dat God 'n ewige plan vir hierdie liggame van ons het. Die liggaam en die siel is deur God gemaak en heilig. Plato kon slegs van sonde ontslae raak deur van die liggaam ontslae te raak, Jesus het dit gedoen deur die liggaam op te wek! (1 Korintiërs 15).
Die opstanding beteken dat Jesus se bediening nie geëindig het nie: Hy is ook volkome in staat om hulle wat deur Hom na God kom, te verlos, omdat Hy altyd leef, om ter wille van hulle in te tree (Hebreërs 7:25).
10 Daarna het die dissipels weer huis toe gegaan. Johannes het huis toe gegaan, vir altyd verander. Al het hy nie verstaan nie. Hy was die geliefde van Jesus.
Geliefdes van Jesus,
Julle staan op die punt om huis toe te gaan. Maar ek bid dat dit nie dieselfde is as toe jy vanoggend ingekom het nie.
Hy het opgestaan. Hy het waarlik opgestaan. Dit verander alles.
Amen.